84 кӯдаки тоҷикро аз Ироқ ба Душанбе оварданд

Шаби 30 апрел 84 кӯдаки тоҷикро тавассути ҳавопаймои ширкати ироқии Fly Erbil аз Бағдод ба Душанбе оварданд.

Мақомоти Тоҷикистон шаби 30-юми апрел дар изҳороти расмӣ гуфтанд, ки баргардондани кӯдакон "бо пуштибонии ҳукумат ва дар ҳамкорӣ бо Вазорати корҳои хориҷии Ироқ ва Кувайт ва созмонҳои байналмилалӣ, бахусус ЮНИСЕФ, сурат гирифтааст".
Раҷабмоҳ Ҳабибуллозода, омбудсмени кӯдак дар Тоҷикистон гуфт, ин кӯдакон аз ташхиси тиббиву равонӣ мегузаранд.

Шаби 30-юми апрел барои дидани кӯдакон бобову бибӣ ва хешу таборашон ба фурудгоҳи байналмилалии Душанбе омада буданд. Асолатмоҳ Тиллоева, сокини ноҳияи Абдураҳмони Ҷомӣ гуфт, бо даъвати мақомот ба пешвози набераҳояш – Абӯбакру Фотимаи 6 ва 3-сола – омадааст.

Асолатмоҳ Тиллоева гуфт, баъд аз зӯҳри 30-юми апрел мақомот барояш хабар додаанд, ки наберагонаш ба Душанбе оварда мешаванд ва баробари шунидани ин хабар ба сӯи пойтахт шитофтааст. "Имшаб барои мо шаби хушбахтӣ аст", -- гуфт ӯ.

Ба гуфтаи ин зан, шумори зиёде дар ноҳияи Ҷомӣ мисли онҳо чашм ба роҳи фарзандони худ аз Ироқу Сурия мебошанд ва умед доранд, ки билохира набераҳои худро ба канор хоҳанд гирифт.